Cómo ellos mesmos dicien "Defendamos ca puestu trabayu"
Entrevista al trabayaor despedíu, fecha por Aruelu.com
El viniente martes 23 de marzu tien llugar el xuiciu por despidu improcedente del trabayador Xandro Suari del chigre l’Ayalga, a les 12 hores ta prevista una concentración de sofitu nel Xulgáu de lo Social 2, na cai Prendes Pando de Xixón onde se celebrara’l xuiciu. Un conflictu qu’a duelgu de ser llaboral ta tomando tintes políticos y que nesti mundín asturianista nuesu ta xenerando una gafa polémica. Dende Aruelu ufiertamos esta entrevista intentando apurrir conocencia del casu a los nuesos llectores d’una forma llóxica y ordenada. Queremos recordar que, cualesquier persona o muérganu nomaos puen ponese en contautu cola redaición pa exercer el derechu a retruque si lo ven necesario.
¿Cuándo y cómo entamó la to rellación llaboral nel Llar d’Andecha de Xixón?
Yo entamo a trabayar dende qu’abren el chigre un 8 de Marzu de 2008 o seya fai agora 2 años. El porqué m’escueyen como camareru pal chigre yo creo qu’eso sería meyor que te lo desplicasen ellos. Pero supongo que les razones tienen que ver per un llau con que nun teníen quién se ficiere cargu nesi intre d’esa xera n’Andecha, porque maxinaben que yo como militante dende fai munchos de la CSI, de Calecer y d’otros espacios sociales asturianos diba mover otra xente a la qu’ellos nun son llegar y tamíen supongo que foi porque yo tuviera trabayando fai años n’Ayalga orixinal (chigre y chigreru míticu de Xixón, na cai Jacobo Olañeta) que pa ellos “supuestamente" yera un poco’l modelu a imitar. Lo de quién me contrata ye una entruga enrevesosa de desplicar, pero fisicamente quien lo fai ye Marcos Abel Fernández Marques. Agora si la entruga ye pa quién trabayé 19 meses, pues polo visto pa un matu d’asociaciones y fundaciones na que s’entemecen una y otra vuelta les mesmes persones (Fundación Andecha, Andecha Astur, Ensame Sidreru, Asociación Cultural l’Ayalga).
¿Cuála yera la situación llaboral?
Lo de les hores de trabayu a vegaes ye dalgo mui relativo na hostelería, porque sabes cuando entres pero non cuando sales. Yo abría a les 7 la tarde tolos díes menos los martes que descansaba y pesllaba según cuadrase, tengo zarrao a les 7 la mañana o a les 12 la nueche. Amás y anque nun ye dalgo no que la xente caiga na cuenta tenía que dir poles mañanes pa quedar colos provedores o pa llimpiar si nun lo ficiere la nueche enantes. Poro, andaba tranquilamente poles 40 hores selmanales o más.
Lo d’aseguráu res de res, esi yera un compromisu que plantegaren de mano y qu’a la fin enxamás nunca cumplieren. Lo de si facía llabores ayenes al puestu de mio, nun se mui bien que te dicir ye evidente que facía munches más coses que cualesquier camareru, por tar solu tocábame tolo que tuviese que ver col día a día nel chigre: tratar colos provedores, tar pendiente lo que s’estropia, llimpiar etc…. Sobre lo de la prevención de riesgos llaborales eso nin llegó a tar enxamás nunca na so “fueya de ruta”.
¿Y que foi lo que pasó?
Lo que pasó ye que según van pasando los meses les condiciones yá bastante precaries de por sí van deteriorándose más entovía, quieren ampliar horarios ensin meyorar les mios condiciones porque dicen que los númberos de la caxa nun son lo qu’asperen (anque nel entamu cuntaren qu’esi nun diba ser una torga, porque’l chigre quería furrular más nel sen del llar social). Ente la mio ñegativa a l’ampliación del horariu, (yo llego a propone-yos delles coses alternatives que nun lleguen nin a tomar en consideranza) escomiencen a pasar coses rares.
De la nueche a la mañana plantéguenme que tán camentando zarrar el chigre porque nun da rendimientu bastante (anque estos señores facíen invidable al chigre cargándo-y gastos a los resultaos, pa que nun fuese rentable). Casi de siguío viénenme con que tienen 3 ufiertes pa facese cargu de la xestión del chigre (abandonando cualquier tentación d’un rollu más social pa metese fasta’l corveyón nel tema hosteleru), anque ellos caltendríen el control del llocal. Dempués d’entrugame qué coses al mio paecer necesitaba’l chigre, porque la idega d’ellos ye que la persona qu’entrase al chigre ficiese una inversión nel llocal p’ameyoralu y si la cosa salía mal ellos recuperaben otra vegada’l llocal pero acuriosáu.
Marcos Abel Fernández Marqués preséntame al que supuestamente va facese cargu del chigre, que tiempu dempués entérome que ye cuñáu d’elli. Esti señor queda con Marcos p’aconceyase conmigo nel mesmu chigre, (porque supuestamente yo diba siguir trabayando nel mesmu) cuéntame qué idegues tien pal chigre, fala d’unes condiciones d’ablucar: 16 o 17 hores diaries ensin descansu, nun zarrar dengún día de la selmana, en cuantes-y faló de condiciones llaborales, de tar aseguráu, de perres y demás echa balones fuera, que-y dea tiempu pa ver como va’l chigre de caxa, que primero tien que ver y que llueu falamos. El paisanu garra la puerta pa marchar ensin dame nin el telefonu (tuvi que da-y yo el de mio y pidi-y el d’elli, colo que yá me queda a les clares que yá pueo asperar sentáu a que me llame).
D’ehi p’alantre desencadenense los acontecimientos: Marcos Abel Fernández Marques llégame diciendo que’l chigre tien que tar zarráu pal 12 o’l 13 d’Ochobre tolo más, (too esto 4 o 5 dies enantes d’esta fecha) que de xuru que si nun tuvieren previsto facer la espicha del DMR 09 nel chigre nun aguantaren con elli abiertu, nin siquera fasta entós. El 13 d’ochobre póngome a abrir el chigre pa poder dir recoyiendo coses personales que yo tenía nel llocal y alcuéntrome con que camudaron la pesllera ensin avisame colo que nun pueo entrar (tovía ye’l día de güei que siguen teniendo coses de mio que nun me volvieren y incluso d’otra xente) too esto ensin avisu previu. Pasen los díes y nun vuelvo a saber nada nin del supuestu empresariu, nin del señor Marques fasta que delles selmanes más tarde llámame a casa pa quedar y que zarremos la caxa del caberu mes, (yá que solía venir en pasando’l 8 de cada mes pa recoyer les perres que se ficieren de caxa) yá que coles prieses por pesllar a les carrenderes que paez que tenía, esi mes entovía nun lu ficiéremos. Quedó con esti señor tenemos una engachada grande, porque-y echo en cara les formes yá’l fondu del tratu, que me paez completamente inxustificáu, y esti señor dedicase a echar balones fuera. Que si la persona qu’entra ye normal que camude la pesllera, que si nun podíamos siguir asina porque yeramos una empresa deficitaria, que podía tener negociao col qu’entraba les mios condiciones qu’ellos yá negociaren lo d’ellos ...... Dempués de falar con esti señor yá nun tengo denguna dulda en cuantes a que me tán faciendo la cama y nesi mesmu intre tomo la decisión que tuviera evitando fasta ehí: denuncialos ente’l UMAC yá’l xulgáu lo social.
Depués de dase a conocer el casu asoleyóse un blog llamáu Atracu Astur ¿qué puedes contanos d’elli?
Pues básicamente ye un preséu pa poder dar a conocer a la xente della información que fuimos atopando y alcontrando dempués de dellos meses d’investigación. Paezmos importante axuntar toa una montonera de datos qu’igual la xente nun conoz de cómo furrula esti señor y les vinculaciones polítiques, familiares, económiques y sociales que puea tener. Per otru llau tamíen ye un mou de dar a conocer la campaña que se ta faciendo de solidariedá conmigo y paecíamos necesario autoxestionar la información pa nun tar depediendo de si mos publiquen o non delles coses los medios. Polo que paez ta teniendo una perbona acoyía, los númberos de visites anden yá poles 6000 lo que pa un blogue modestu como esti creyemos que ta más que bien y damos aliendu pa siguir pol camín entamáu, eso si dende la rigurosidá de la información qu’espublizamos, ye too contrastable. Nun mos vamos a dedicar a los llevantos y a los bilordios que desgraciadamente inunden la rede, eso tuvimoslo bien nidio dende qu’escomencipiamos cola xera.
¿Cómo son les tos rellaciones agora colos miembros d’Andecha Astur y cola militancia de Xixón concretamente?
Llóxicamente les rellaciones col señor Gozali Lechosa y Fernández Marqués tán más que fríes, yo diría que tán xelaes, hai otros militantes d’Andecha Astur, dalgún d’ellos históricos del nacionalismu asturianu, que danse cuenta perfeutamente que metieron la pata fasta’l cuezu conmigo. Anque ye evidente que nun van salir publicamente a desautorizar a estos dos señores. Prestaríame enforma dexalo bien afitao, yo traté por tolos medios d’evitar esta situación, eso sí, ensin arrenunciar a los mios drechos, pero l’actitú absolutamente belixerante del señor Fernández Marqués fizo imposible un alcuerdu y arrastró tres d’elli cola so decisión al restu de la organización, que tán viéndose obligaos a defender lo indefendible. Ye más, incluso hai dellos militantes d’Andecha Astur qu’intentaron mediar pero foi del too imposible. Sería bono que-yos esplicase a los sos compañeros d’organización los motivos, personales, económicos o políticos que lu mueven pa facer tala cosa. Eso si nun descartamos que cuando faigamos público delles informaciones que tenemos nel nuesu poder y qu’entovía nun asoleyamos dalgunos militantes d’Andecha Astur van quedar ablucaos.
¿Sienteste respaldáu?
El respaldu, pues de xuru que toa la xente que tien un conflictu prestaría-y que seya mayor del que ye, pero ye verdá que n’Asturies fai bien d’años que nun cuerren bonos tiempos pa la llírica, polo tanto nun toi pol llabor de quexame, nun sería xusto. Teo’l respaldu del sindicatu nel que milito, la CSI y hai della xente que nun ye de la Corriente que tán ehí conmigo sofitando y a la que-yos toi mui agradecíu. Pero pa entamar la griesca lo único que se necesita ye la voluntá personal de nun dase ente l’alversidá y tener nidio que si nun lluches pues perder, pero pero si nun lo faes yá tas perdíu enantes d’entamar. Como dicía’l Che "la única llucha que se pierde ye la que s’abandona" y polo tanto vamos a siguir apertando los dientes y tirar p’alantre que ye lo que tenemos que facer.
¿Qué espeutatives tienes de cara al xuciu?
Un xuiciu ye una moneda al aire colo que pue pasar de too, porque nun solo ties que tener la razón, sinón que tienen que date la razón xurídica que nun siempres van de la mano. Ye un xuiciu complicáu de mano por tol telar asociativu que tienen, nun solo tendríen que condenalos, sinón que dempués hai que ver a quién condenen; demandamos a 4 asociaciones o organizaciones y 2 persones físiques, y a que-yos condenen. Más llueu hai la posibilidá de que dependiendo a quién condenen, al nun ser que lo seyan solidariamente, que se declaren insolventes y tea qu’intervenir el Fogasa. Pero tamíen ye cierto que nós siguimos abiertos a la negociación fasta’l 23 de marzu que ye’l xuiciu, porque ye evidente que ye dalgo desagradable la situacíon na que mos metió non solo a min, sinón a otra xente la cabezonería d’esti señor. En cualquier conflictu del tipu que seya siempre hai daños colaterales y nesti pues ye evidente qu’hai una organización política que ta pagando un coste pola actitú d’un señor. Prestaríame remarcalo enforma esto ye un problema llaboral, un despidu improcedente y non un tema políticu; independientemente de que dientro los denunciaos tea una organización política que ye onde esti señor lo quier asitiar pa presentase como la víctima. Pero como diz el refrán dos nun discuten si ún nun quier, anque nesti casu hailu que prefier la engaradiella, anque con ella tea arrastrando a otra muncha xente. Sobre los conceyos de mediación, enantes del xuiciu siempre hai un actu de conciliación nel UMAC al que solo se presentó Arturu Bermeyu nel nome de la fundación Andecha y que ñegó tener nada que ver col despidu, los demás demandaos nun apaecieron, incluso dalgunos polo visto foi del too imposible notifica-yoslo gracies al marabayu de direiciones que tienen.
¿Ties trabayu agora mesmo?¿Cómo t’enfrentes al fechu de tar en paru nuna situación de crisis como na que tamos?
Agora mesmo non, en cuantes a lo de cómo lo enfrento nun toi mui d’alcuerdu como plantegues la entruga. El paru nun ye un problema individual (que tamién), ye un problema colectivu d’esta sociedá y polo tanto ye la mesma sociedá la que tien qu’igualo. Polo tanto nun ye cómo yo m’enfrento al paru y la crisis n’Asturies, sinón cómo la sociedá asturiana ye capaz d’enfrentar la crisis que venimos careciendo los caberos 30 años y cómo somos capaces de construyir ente toes y toos preseos pa poder solucionar esta situación. El problema ye que si nesta sociedá la única forma de socialización y sobervivencia xira al rodiu del emplegu asalariáu y per otru llau esa posibilidá ñégase-y a una bona parte la sociedá dalgo falla. Los ingresos de la xente nun tendríen de depender de si tienen trabayu o non, porque nesti modelu social nel que vivimos eso termina convirtiéndose nuna condena de por vida pa munches persones. Hai una entruga que tenemos que facemos que ye si queremos una economía al serviciu la xente o a la xente al seviciu la economía. Emplegando una frase de don Luis Redondo, primer secretariu xeneral de la CSI, que yo creo que lo desplica bastante meyor :"O mos salvamos toos col alma coleutiva o col alma individual mos vamos al infiernu"
No hay comentarios:
Publicar un comentario