Comunicáu del Ensame de Trabayaores Asturianos Jose María Martínez
L’Ensame de Trabayaores Asturianos Jose María Martínez, ta llevando alantre una campaña d’información y denuncia de la precariedá llaboral y les penoses condiciones de trabayu que carecen la gran mayoría de les trabayadores del grupu empresarial Andecha Astur Sociedá Limitada. Sobremanera, toes aquelles que nun tenemos denguna rellación de calter familiar u organizativa col empresariu y alministraor únicu Marcos Abel Fernández Marqués.
Pa nós, el grupu empresarial Andecha Astur S.L. impón unes condiciones llaborales inaceutables: xornaes llaborales interminables, hores estres nun remuneraes, nun s’asegura a les trabayadores poles hores trabayaes, los trabayos de fin de selmana faense de contino ensin contratu, cúntase namás que con un díi de descansu selmanal, los sueldos nun algamen el SMI, los despidos nun son notificaos por escritu, nun se respeten los plazos de notificación establecíos e incluso tien daose’l casu d’apropiación indebida d’oxetos personales de les trabayaores, pol procedimientu de camudar la pesllera la empresa impidiendo’l pasu a les compañeres.
Pero’l braeru problema nos escuros negocios d’Andecha Astur S.L, ye la falta ferramientes que garanticen el cumplimientu les normatives llegales que regulen la xera llaboral. Asina, los Convenios Coleutivos, tórnense en papel moyáu porque incúmplense dafechu.
A too ello hai d’amestar les torgues coles que mos atopamos al denunciar les irregularidaes ya incumplimientos delantre la Inspeición de Trabayu, que nun son quien a sacar a la lluz toles irregularidades denunciaes, y, con ello, permite, tolera y tórnase cómpliz, anque seya de mou indereutu, de la situación d’inxusticia ya indefensión de la gran mayoría los y les trabayadores de la empresa Andecha Astur S.L.
Asina les coses, vamos siguir asoleyando nes muries y escaparates de la patronal (“La vindicación del Pueblu trabayaor asturianu”) al mesmu tiempu repartiremos propaganda per tolos centros de trabayu (chigres, asociaciones, fundaciones, editoriales, clíniques e institutos yaeso) na que s’informa a les trabayadores de los sos drechos, ufiertándo-yos el nuesu sofitu y solidaridá activa, pa la igua los sos conflictos y reivindicaciones llaborales.
Pa finar, vamos siguir al empar una campaña de denuncia delantre Inspeición de Trabayu, de toos aquellos negocios d’Andecha qu’incumplan la normativa llaboral vixente nel Conveniu Coleutivu pidiendo les responsabilidaes alministratives y xudiciales que procedan, escontra Inspeición de Trabayu y Direición Xeneral de Trabayu si éstes persisten na so actitú de permisividá y tolerancia delantre los fraudes cometíos pola autodenominada izquierda d’Asturies.
Obreru despedíu, patrón colgáu
Coles tripes del ultimu burgués, aforcaremos al Marqués
